Arman Najmi
taj-e-zarrin na koi masnad-e-shahi mangun
main to bas apne hi hone ki gavahi mangun
mujh ko suqrat ka mansab nahin hasil karna
kya main sach bol ke apni hi tabahi mangun
haar ja.unga to miTTi ke qadam chumunga
girti divar se kya pusht-panahi mangun
zeb deta hai mire tan pe faqiri ka libas
kisi darbar se kya ḳhil.at-e-jahi mangun
meri vahshat ko ye sahra ki masafat kam hai
sair ke vaste kuchh aur faza hi mangun
tirgi men abhi itna to nahin Duuba huun
ki na.e din ke ḳhazane se bhi syahi mangun
Leave a Reply