Mubashshir Saeed
inkar ki lazzat se na iqrar-e-junun se
ye hijr khula mujh pe kisi aur fusun se
ye jaan chali jaa.e magar aanch na aa.e
adab-e-mohabbat pe kisi harf-e-junun se
ujlat men nahin hogi tilavat tire ruḳh ki
aa baiTh mire paas zara der sukun se
ai yaar koi bol mohabbat se bhara bol
kya samjhun bhala main tiri haan se tiri huun se
divar ka saaya to mujhe mil nahin paaya
baiTha huun tiri yaad men ab lag ke sutun se
tujh se to miri ruuh ka bandhan tha mire yaar
anjan raha tu bhi mire hal-e-darun se
Leave a Reply