daba jo raakh ki tah men sharar na ḳhatm hua
bhaḌak uThega dabav agar na ḳhatm hua
laraz rahe hain musafir ke raungTe ab tak
panah-gah men bhi luTne ka Dar na ḳhatm hua
milen jo raah men dekhen na aankh bhar kar ham
ghaTa hai rabt magar is qadar na ḳhatm hua
racha hua hai tajassus ka sam fazaon men
ajab fasana tha anjam par na ḳhatm hua
har ek samt se phuuT aa.i hain na.i shaḳhen
tane ke kaTne se nam-e-shajar na ḳhatm hua
uTha ke dost mujhe chal diye hain kandhon par
hayat ḳhatm hui par safar na ḳhatm hua
fasil-e-jabr men dekhe usi ke sapne ‘jan’
kisi bhi haal men zauq-e-nazar na ḳhatm hua
Leave a Reply