Farooq Engineer
ungli figar koi na ḳhuun men qalam hua
kab ham se apne dard ka qissa raqam hua
ro.e tamam umr magar is hunar ke saath
aansu palak pe aaya na kaghaz hi nam hua
ghar chhoḌ aa.e aap bhi achchha kiya huzur
ye to junun ki raah men pahla qadam hua
rah rah ke sar uThati rahin kitni ḳhvahishen
in baghiyon men sar bhi kisi ka qalam hua
dekha tha ḳhud ko main ne tujhe dekhne ke ba.ad
ye to gunah mujh se ḳhuda ki qasam hua
hai tarz-e-guftugu bhi vahi dost bhi vahi
dushman to meri jaan ka mera bharam hua
‘faruq’ ab kisi se shikayat karen to kya
ham ko hi apne hone ka ehsas kam hua
Leave a Reply