bas zara der se ehsas hua tha mujh ko
vo bhi meri hi tarah soch raha tha mujh ko
ye hi ik shaḳhs bhaTakta hai jo sahra sahra
ek din shahr-e-tamanna men mila tha mujh ko
main to maujud tha har dam tire afsane men
mere raavi ne magar maar diya tha mujh ko
main ne jab us ko bataya to zara abr chhaTa
us ne auron ki zabani hi suna tha mujh ko
aur phir kah hi diya main ne bhi ik din amin
vo duaon men bahut maang raha tha mujh ko
ho na ho vo pas-e-divar abhi hai maujud
raushni ka abhi ehsas hua tha mujh ko
ye na socha tha ki is ranj pe hona hai tamam
ḳhatm hona hai ta.alluq ye pata tha mujh ko
ye jo pathra.i si ankhen hain usi shaḳhs ki hain
jis ne raste men kabhi chhoḌ diya tha mujh ko
iḳhtiyar us ka havaon pe nahin tha ‘tariq’
us ne dahliz pe raushan to kiya tha mujh ko
Leave a Reply