shahr ka shahr hai be-zar kahan ja.un main
aur tanha.i hai dushvar kahan ja.un main
log marte hain sisakte hain maze lete hain
dekh kar surḳhi-e-aḳhbar kahan ja.un main
tu jo kahta hai ki ye ḳhak-e-vatan teri hai
main kahan par huun mire yaar kahan ja.un main
ek inkar pe mauquf hain saare qisse
main kahan sahab-e-kirdar kahan ja.un main
mujh ko rishton ki tijarat kabhi manzur na thi
sochta huun sar-e-bazar kahan ja.un main
parsa ḳhvab sabhi us ke tasarruf men rahe
raat bhi ho ga.i badkar kahan ja.un main
koi manzil tiri niyyat se kabhi raushan ho
ai mire qafila-salar kahan ja.un main
ek jhanDe hain sabhi rang juda hain un ke
kaun hai kis ka alam-dar kahan ja.un main
jitne munkir the tire saare farishte nikle
ek main tera gunahgar kahan ja.un main
main kinare pe khaḌa soch raha huun ‘ḳhurshid’
naav ke saath hai manjdhar kahan ja.un main
Leave a Reply