kaun si shai men tira nuur nahin
kis jagah par tira zuhur nahin
dil se aati hai ye sada paiham
paas tere huun tujh se duur nahin
dil-e-vahshi ne the qadam chume
is men koi mira qusur nahin
khaak ho kar ghubar-e-rah bano
nakhvat-o-kibr kuchh zarur nahin
jalva dikhla de shah-e-din mujh ko
tere lutf-o-karam se duur nahin
jalva-e-nur se jala tha koh
dil makan-e-khuda hai tuur nahin
ai ‘jamila’ gunah ka kya dhadka
naam is ka magar ghafur nahin
Leave a Reply