Anjum Khayali
azar mire dil ka dil-azar na ho jaa.e
jo karb nihan hai vo numudar na ho jaa.e
avaz bhi deti hai ki uTh jaag mere la.al
Darti bhi hai bachcha kahin bedar na ho jaa.e
jab tak main pahunchta huun kaḌi dhuup men chal kar
divar ka saaya pas-e-divar na ho jaa.e
parda na sarak jaa.e kahin ai dil-e-betab
vo parda-nashin aur pur-asrar na ho jaa.e
baḌhta chala jaata hai zamane se ta.alluq
ye silsila zanjir-e-giran-bar na ho jaa.e
aram se rahta hi nahin banda-e-be-dam
jab tak kisi mushkil men giraftar na ho jaa.e
Leave a Reply