ishq kar ke dekh li jo bebasi dekhi na thi
is qadar uljhan men pahle zindagi dekhi na thi
ye tamasha bhi ajab hai un ke uTh jaane ke baad
main ne din men is se pahle tirgi dekhi na thi
aap kya aa.e ki ruḳhsat sab andhere ho ga.e
is qadar ghar men kabhi bhi raushni dekhi na thi
aap se ankhen mili thiin phir na jaane kya hua
log kahte hain ki aisi be-ḳhudi dekhi na thi
mujh ko ruḳhsat kar rahe hain vo ajab andaz se
aankh men aansu labon par ye hansi dekhi na thi
kis qadar ḳhush huun main ‘nasir’ un ko pa lene ke baad
aisa lagta hai kabhi aisi ḳhushi dekhi na thi
Leave a Reply