Afzal Allahabadi
tum hamare ho ham tumhare hain
jaise dariya ke do kinare hain
ruthe ruthe se sab nazare hain
ik hamin hain jo gham ke maare hain
vo milate nahin nazar ham se
aur kahte hain ham tumhare hain
hausla hai hamare dil men abhi
ham kahan zindagi se haare hain
kya bataen ki teri furqat men
kis tarah ham ne din guzare hain
us ko meri kami satae kyuun
jis ke daman men chand taare hain
ham ko ‘afzal’ hai aasra us ka
kaise kah den ki be-sahare hain
Leave a Reply