kabhi vaqt ki saans men
hont uljha ke dekhe hain tum ne
ki is bad-guman mausamon ke mughanni ki tanen
nihan khana-e-dil men
gahri khamoshi ki haibat girati chali ja rahi hain
azal se abad tak bipharte hue
sail-e-be-maigi men kabhi
dil ukhadte hue shahr girte hue
dekh paae ho tum
kabhi bhige bhige se divar-o-dar men
ki bachpan ki galiyon makanon men
barish ki avaz se dil dahalte hue
kisi mushtarak khauf ki ahaton se
dhadakte hue bam-o-dar aur ziine
musalsal hava aur barish ki avaz chalti hui
kabhi munh-andhere ki taqdis men
duur se aati gaadi ki siiti ko sunte hue
tum ne socha hai un ke liye
jin ke qadmon men manzil
musalsal azaab aur khvabon se taabir tak duur hai
kabhi shaam ki sansanati hava men
thithurti khamoshi ki sahmi sada sun ke
darvaza khola hai un ke liye
jin ke hathon ki larzish men dastak nahin
mujhe puchhna hai
ki khulte hue phuul chalti hava
aur guzre mah-o-sal ki dastakon par
na ho sakne valon pe aansu bahae hain tum ne
ki main
raat ki ek hichki men thahri hui saans huun
aur tumhari ghani niind ke bazuon se
phisalta hua lams huun
Leave a Reply