Dasht-Paimai Ka Gar Qasd Mukarrar Hoga

dasht-paimai ka gar qasd mukarrar hoga

har sar-e-khar pae-abla nashtar hoga

mai-kade se tira divana jo bahar hoga

ek men shisha aur ik haath men saghar hoga

halqa-e-chashm-e-sanam likh ke ye kahta hai qalam

bas ki markaz se qadam apna na bahar hoga

dil na dena kabhi in sang-dilon ko yaaro

chuur hovega jo shisha tah-e-patthar hoga

dekh leta vo agar rukh ki tajalli tere

aaina khana-e-mayusi men shashdar hoga

chaak kar Dalunga daman-e-kafan vahshat se

astin se na mira haath jo bahar hoga

ai ‘rasa’ jaisa hai bargashta zamana ham se

aisa bargashta kisi ka na muqaddar hoga

Leave a Comment