piyun hi kyuun jo bura janun aur chhupa ke piyun
main vo nahin ki nigahen bacha bacha ke piyun
miTa diye hain sab ehsas uf re zauq-e-sharab
surur kam na ho turshi bhi gar mila ke piyun
gunah pe tohmat-e-be-lazzati na rakh zahid
maza na aa.e to kyuun munh bana bana ke piyun
ye tishnagi-e-shahadat ka iqtiza ab hai
ki ab-e-tegh-e-sitam zahr men bujha ke piyun
gale men lagti hai ifrat-e-shauq se phansi
paḌe na halq men phanda to DagDaga ke piyun
hai ek saghar-e-dil aur hazar-rang ki mai
na ho jo ghar men to bazar se manga ke piyun
bharosa kar ke main apne rahim par vaa.iz
maza to jab hai ki tujh ko jala jala ke piyun
talab se aar hai itni ki pyaas gar na bujhe
jigar ke ḳhuun ko paani bana bana ke piyun
nigah-e-shauq miri ruuh khinch leti hai
nahin vo rind ki saghar se munh laga ke piyun
ye shai ki jis se nigahon ko rashk dil ko surur
chhupa chhupa ke unDelun dikha dikha ke piyun
gunahgar sahi chor main nahin zahid
hai ye bhi kufr ki ka.abe se munh phira ke piyun
na rind-e-tang-nazar ‘arzu’ na tanha-ḳhor
jo zahr bhi ho mayassar to main pila ke piyun
Leave a Reply