Manish Shukla
ḳhvab ka chehra piila paḌte dekha hai
ik ta.abir ko suuli chaḌhte dekha hai
ik tasvir jo a.ine men dekhi thi
us ka ik ik naqsh bigaḌte dekha hai
sub.h se le kar shaam talak un ankhon ne
apne hi saa.e ko baḌhte dekha hai
us se haal chhupana to hai na-mumkin
ham ne us ko ankhen paḌhte dekha hai
ashk-e-ravan rakhna hi achchha hai varna
talabon ka paani saḌte dekha hai
ik ummid ko ham ne akasr ḳhalvat men
ek adhuri murat gaḌhte dekha hai
dil men koi hai jis ko akasr ham ne
har ilzam hamin par maḌhte dekha hai
Leave a Reply