safar ki ibtida hui ki tera dhyan aa gaya
miri zamin ke samne ik asaman aa gaya
ye faisla hua miri shanakht aina kare
magar ye kis ka aks hai jo darmiyan aa gaya
ajiib uljhanon men ab ke saaten guzar gaiin
nisab yaad bhi nahin aur imtihan aa gaya
hisar-e-sail-e-ab se to naav bach gai magar
hava ke haath sahilon pe badban aa gaya
nigah aur raste ke dukh to raushni se the
charagh bujh gae to mera mehman aa gaya
tiri sada pe mujh ko lautna tha jang chhod kar
magar vo ek tiir jo sar-e-kaman aa gaya
main bam-o-dar se puchh aauun koi aaya to nahin
‘salim’ raat dhal gai mira makan aa gaya
Leave a Reply