Firaq Gorakhpuri
jin ki zindagi daman tak hai bechare farzane hain
khaak udate phirte hain jo divane divane hain
vahdat-e-insan apne ko shair se manva leti hai
kya anjane kya begane sab jane-pahchane hain
mujh ko shair kahne vaalo main kya meri ghazlen kya
main ne to bas sarkar-e-ishq men kuchh parche guzrane hain
bhole-bhale mahbubon se danv-pech kuchh chal na saka
ham ye samajhte rahe abhi tak ham bhi kitne siyane hain
hosh-o-khirad kya josh-e-junun kya ulti ganga bahti hai
kya farzane kaise siyane yaaro sab divane hain
jal-bujhne ki bhi taufiq kahan ushshaq ki qismat men
ik an-dekhi sham-e-bazm ke dil vaale parvane hain
shair se hamdardi sikho duniya ke gham-khane men
jitne gham hain duniya bhar men is ke mane-jane hain
shahr-e-nigaran shahr-e-nigaran kaun batae kaisa hai
puchhte ho kya ham se yaaro ham bhi to begane hain
bas vo unhi se fitrat ko khalon ke libas pahnata hai
shair ke palle kya hai giton ke tane-bane hain
kitne begane hote hain ye jane-pahchane log
jaane hue bhi ba-qaul hamare anjane begane hain
aaj se pahle kab the vatan men be-vatani ke ye lachchhan
logon ko ye kahte suna hai ghar bhi ghurbat-khane hain
kuchh nahin khulta kis ki zad men ye hasti-e-gurezan hai
ham jo itne bache phirte hain kin tiron ke nishane hain
is gum-karda-e-dida-o-dil ko kal tak kitne jante the
ab to ‘firaq’-e-be-khud ke aalam aalam afsane hain
Leave a Reply