Shafiq Saleemi
tiir ḳhatm hain to kya haath men kaman rakhna
is muhib jangal men hausla javan rakhna
kya pata hava.en kab mehrban ho jaa.en
paniyon men jab utro saath badban rakhna
ranjishen bhula dena fasle miTa dena
ik mahin sa parda phir bhi darmiyan rakhna
ham bhi honT si lenge ji sake to ji lenge
kya koi zaruri hai bolti zaban rakhna
ye ghaḌi to aa.i thi yuun hi sargirani thi
ab fuzul lagta hai koi sa.eban rakhna
lahr lahr bikhri hai qahr qahr dariya men
be-javaz lagta hai sa.i-e-ra.egan rakhna
dusron ki zid huun main kitna munfarid huun main
ye bhi kya ki sab jaisa sar pe asman rakhna
Leave a Reply