Malikzaada Manzoor Ahmad
ḳhvab ka rishta haqiqat se na joḌa jaa.e
a.ina hai ise patthar se na toḌa jaa.e
ab bhi bhar sakte hain mai-ḳhane ke sab jam-o-subu
mera bhiga hua daman jo nichoḌa jaa.e
har qadam marhala-e-marg-e-tamanna hai magar
zindagi phir bhi tira saath na chhoḌa jaa.e
aao phir aaj kureden dil-e-afsurda ki raakh
aao soi hui yadon ko jhinjhoḌa jaa.e
ho vo tauba ke ho saghar ke ho paiman-e-vafa
kuchh na kuchh aaj to mai-ḳhane men toḌa jaa.e
zulf o ruḳh aaj bhi unvan-e-ghazal hain ‘manzur’
ruḳh udhar gardish-e-ayyam ka moḌa jaa.e
Leave a Reply