Qateel Shifai
mere khvabon ke shabistan men ujala na karo
ki bahut duur savera nazar aata hai mujhe
chhap gae hain miri nazron se khad-o-khal-e-hayat
har taraf abr ghanera nazar aata hai mujhe
chand taare to kahan ab koi jugnu bhi nahin
kitna shaffaf andhera nazar aata hai mujhe
koi tabinda kiran yuun mire dil par lapki
jaise soe hue mazlum pe talvar uthe
kisi naghme ki sada guunj ke yuun tharrai
jaise tuuti hui pazeb se jhankar uthe
main ne palkon ko uthaya bhi to aansu paae
mujh se ab khaak javani ka koi baar uthe
tum ne raton men sitare to tatole honge
main ne raton men andhere hi andhere dekhe
tum ne khvabon ke paristan to sajae honge
main ne mahaul ke shab-rang pharere dekhe
tum ne ik taar ki jhankar to sun li hogi
main ne giton men udasi ke basere dekhe
mire gham-khvar mire dost tumhen kya maalum
zindagi maut ke manind guzari main ne
ek bigdi hui surat ke siva kuchh bhi na tha
jab bhi halat ki tasvir utari main ne
kisi aflak-nashin ne mujhe dhutkar diya
jab bhi roki hai muqaddar ki savari main ne
mire gham-khvar mire dost tumhen kya maalum!
Leave a Reply