Kitne Hi Faisle Kiye Par Kahan Ruk Saka Hun Main

kitne hī faisle kiye par kahāñ ruk sakā huuñ maiñ

aaj bhī apne vaqt par ghar se nikal paḌā huuñ maiñ

abr se aur dhuup se rishta hai ek sā mirā

aa.ine aur charāġh ke biich kā fāsla huuñ maiñ

tujh ko chhuā to der tak ḳhud ko hī DhūñDtā rahā

itnī sī der meñ bhalā tujh se kahāñ milā huuñ maiñ

ḳhushbū tire vajūd kī ghere hue hai aaj bhī

tere laboñ kā zā.iqa bhuul nahīñ sakā huuñ maiñ

āyatoñ jaise nā-gahāñ jāvedāñ lams kī qasam

tere achhūte jism kā pahlā mukālima huuñ maiñ

vaise to merā dā.era puurā nahīñ huā abhī

aisī hī koī qaus thī jis se juḌā huā huuñ maiñ

jitnī bhī tez dhuup ho shāḳheñ haiñ mehrbāñ tirī

chhāñv parā.ī hī sahī saañs to le rahā huuñ maiñ

Leave a Comment