Ziaul Mustafa Turk
kitne hi faisle kiye par kahan ruk saka huun main
aaj bhi apne vaqt par ghar se nikal paḌa huun main
abr se aur dhuup se rishta hai ek sa mira
aa.ine aur charagh ke biich ka fasla huun main
tujh ko chhua to der tak ḳhud ko hi DhunDta raha
itni si der men bhala tujh se kahan mila huun main
ḳhushbu tire vajud ki ghere hue hai aaj bhi
tere labon ka za.iqa bhuul nahin saka huun main
ayaton jaise na-gahan javedan lams ki qasam
tere achhute jism ka pahla mukalima huun main
vaise to mera da.era puura nahin hua abhi
aisi hi koi qaus thi jis se juḌa hua huun main
jitni bhi tez dhuup ho shaḳhen hain mehrban tiri
chhanv para.i hi sahi saans to le raha huun main
Leave a Reply