Sufi
main kya huun mujhe tum ne jo azar pe khincha
duniya ne masihaon ko bhi daar pe khincha
zindon ka to maskan bhi yahan qabr-numa hai
murdon ko magar darja-e-autar pe khincha
vo jaata raha aur main kuchh bol na paaya
chidiyon ne magar shor sa divar pe khincha
kuchh bhi na bacha shahr men juz rone ki rut ke
har shoala-e-avaz ko malhar pe khincha
yusuf kabhi nilam hua karta tha lekin
yusuf ko bhi is shahr ne hai daar pe khincha
phute hain mere dil men phir inkar ke sote
phir dil ne mujhe halat-e-dushvar pe khincha
har shai ki haqiqat men utar jaaen ab ankhen
zulmat ne mujhe dida-e-bedar pe khincha
dukh alam-e-insan ke the jo vo chhupae
khat chand ko sar karne ka akhbar pe khincha
tum ne to ‘faqih’ apni ana kas ke mujhe bhi
paikan ki tarah halat-e-paikar pe khincha
Leave a Reply