ik baar hi ji bhar ke saza kyuun nahin dete
gar harf-e-ghalat huun to miTa kyuun nahin dete
aise hi agar munis-o-gham-ḳhvar ho mere
yaaro mujhe marne ki dua kyuun nahin dete
ab shiddat-e-gham se mira dam ghuTne laga hai
tum reshmi zulfon ki hava kyuun nahin dete
farda ke dhundlakon men mujhe DhunDne vaalo
maazi ke darichon se sada kyuun nahin dete
moti huun to phir sozan-e-mizhgan se piro lo
aansu ho to daman pe gira kyuun nahin dete
saaya huun to phir saath na rakhne ka sabab kya
patthar huun to raste se haTa kyuun nahin dete
Leave a Reply