Hote Hote Chashm Se Aaj Ashk-Bari Rah Gai

hote hote chashm se aaj ashk-bari rah gai

aabru baare tiri abr-e-bahari rah gai

aate aate is taraf un ki savari rah gai

dil ki dil men arzu-e-jan-nisari rah gai

ham ko khatra tha ki logon men tha charcha aur kuchh

baat khat aane se tere par hamari rah gai

tukde tukde ho ke ud jaega sab sang-e-mazar

dil men bad-az-marg kuchh gar be-qarari rah gai

itna miliye khaak men jo khaak men Dhunde koi

khaksari khaak ki gar khaksari rah gai

aao gar aana hai kyuun gin gin ke rakhte ho qadam

aur koi dam ki hai yaan dam-shumari rah gai

ho gaya jis din se apne dil par us ko ikhtiyar

ikhtiyar apna gaya be-ikhtiyari rah gai

jab qadam us kafir-e-bad-kesh ki janib badhe

duur pahunche sau qadam parhez-gari rah gai

khinchte hi tegh ada ke dam hua apna hava

aah dil men arzu-e-zakhm-e-kari rah gai

aur to gham-khvar saare kar chuke gham-khvargi

ab faqat hai ek gham ki gham-gusari rah gai

shikva ayyari ka yaron se baja hai ai ‘zafar’

is zamane men yahi hai rasm-e-yari rah gai

Leave a Comment