Nadeem Sirsivi
mere kashkol men bas sikka-e-rad hai had hai
phir bhi ye dil mira razi-ba-madad hai had hai
gham to hain baḳht ke bazar men maujud bahut
kasa-e-jism men dil ek adad hai had hai
aaj ke daur ka insan ajab hai yarab
lab pe tarif hai siine men hasad hai had hai
tha miri pusht pe suraj to ye ehsas hua
mujh se uncha to mire saa.e ka qad hai had hai
mustanad mo.atamad-e-dil nahin ab koi yahan
mahram-e-raz bhi mahrum-e-sanad hai had hai
main to tasvir-e-junun ban gaya hota lekin
mujh ko roke hue bas pas-e-ḳhirad hai had hai
roz-e-avval hi men har had se guzar baiTha aur
chiḳhta rah gaya hamdam mira had hai had hai
kab talak ḳhak-basar bhaTke bhala bad-e-saba
ab to har shaḳh pe phulon ki lahad hai had hai
rang-e-iḳhlas bharun kaise marasim men ‘nadim’
us ki niyyat bhi miri tarah se bad hai had hai
Leave a Reply