Saifuddin Saif
phuul is ḳhak-dan ke ham bhi hain
mudda.i do jahan ke ham bhi hain
bahte dhare pe hai qayam apna
saath mauj-e-ravan ke ham bhi hain
kah raha hai sukut-e-lala-o-gul
zaḳhm-ḳhurda zaban ke ham bhi hain
duur rahte hain kyuun jahan vaale
rahne vaale jahan ke ham bhi hain
saath misl-e-ghubar ho lenge
muntazir karvan ke ham bhi hain
‘saif’ ye chashmaken ye rang-e-bahar
kya isi gulsitan ke ham bhi hain
Leave a Reply