Phul Is KHak-Dan Ke Hum Bhi Hain

phuul is ḳhāk-dāñ ke ham bhī haiñ

mudda.ī do jahāñ ke ham bhī haiñ

bahte dhāre pe hai qayām apnā

saath mauj-e-ravāñ ke ham bhī haiñ

kah rahā hai sukūt-e-lāla-o-gul

zaḳhm-ḳhurda zabāñ ke ham bhī haiñ

duur rahte haiñ kyuuñ jahāñ vaale

rahne vaale jahāñ ke ham bhī haiñ

saath misl-e-ġhubār ho leñge

muntazir kārvāñ ke ham bhī haiñ

‘saif’ ye chashmakeñ ye rañg-e-bahār

kyā isī gulsitāñ ke ham bhī haiñ

Leave a Comment