Nazeer Akbarabadi
lipaT lipaT ke main us gul ke saath sota tha
raqib sub.h ko munh ansuon se dhota tha
tamam raat thi aur kuhniyan o laten thiin
na sone deta tha mujh ko na aap sota tha
jo baat hijr ki aati to apne daman se
vo aansu ponchhta jaata tha aur main rota tha
masakti choli to logon se chhup ke siine ko
vo taage baTta tha aur main suui pirota tha
gharaz dikhane ko aan o ada ke sau aalam
vo mujh se paanv dhulata tha aur main dhota tha
liTa ke siine pe chanchal ko pyaar se har-dam
main gudgudata tha hans hans vo zo.af khota tha
vo mujh pe phenkta paani ki kulliyan bhar bhar
main us ke chhinTon se to pairahan bhigota tha
nahane jaate to phir aah karti chhinTon se
vo ghote deta tha aur main use Dubota tha
hua na mujh ko ḳhumar aḳhir un sharabon ka
‘nazir’ aah isi roz ko main rota tha
Leave a Reply