Kisi Chashm-E-Hunar Ki Pasbani Mein Nahin Rahna

kisī chashm-e-hunar kī pāsbānī meñ nahīñ rahnā

sitāre ko ziyāda der paanī meñ nahīñ rahnā

ye miTTī kyuuñ mire qadmoñ se lipTī hai ki jab maiñ ne

hamesha ke liye duniyā-e-fānī meñ nahīñ rahnā

kahīñ is dāstāñ meñ ek aisā moḌ aa.egā

jahāñ kirdār ne apnī kahānī meñ nahīñ rahnā

tujhe hamrāh to rakh lūñgā maiñ lekin dil-e-sāda

tirī bābat ziyāda ḳhush-gumānī meñ nahīñ rahnā

mujhe ik aisī duniyā bhī basānī hai jahāñ ‘shahzād’

kisī ko bhī kisī kī hukmarānī meñ nahīñ rahnā

Leave a Comment