Wo Jo Etibar-E-Jamal the Wo Kahan Gae

Poet

vo jo e’tibar-e-jamal the vo kahan ga.e

vo jo aap apni misal the vo kahan ga.e

kabhi har taraf koi dilkashi si muhit thi

usi dasht men jo ghazal the vo kahan ga.e

kahin ek pal ko bhi tu nazar nahin aa raha

gham-e-dil tire mah-o-sal the vo kahan ga.e

vo jo ḳhvab le ke chale the ham vo kahan gaya

vo jo us ke gham men niDhal the vo kahan ga.e

kabhi pahron us ka bas ik usi ka ḳhayal tha

vo jo hijr the jo visal the vo kahan ga.e

kabhi pahle jab vo mila tha vaisa nahin raha

ka.i rang us men kamal the vo kahan ga.e

ye jo log mere qarib hain ye kahan ke hain

vo jo husn-e-ḳhvab-o-ḳhayal the vo kahan ga.e