Arpit Sharma Arpit
kahne lagi hai mujh se hava kuchh hua to hai
sunne men aa rahi hai sada kuchh hua to hai
mahsus kar raha huun zamin ki nami ko main
din raat ro rahi hai hava kuchh hua to hai
laḌki uTha ke haath falak dekhne lagi
ruTha hua hai kya ye ḳhuda kuchh hua to hai
mad.hosh ho raha huun badan ko sambhal tu
kya aa rahi hai koi qaza kuchh hua to hai
mujh ko nikalna aaj mere jism se paḌa
main hi hava huun mujh se juda kuchh hua to hai
kaliyan sisak ke rone lagi chand raat men
aur peḌ de raha hai sada kuchh hua to hai
rota hua jo dekha use dasht-gah men
tanha.iyon ne mujh se kaha kuchh hua to hai
murshid hi janta hai ke kya hadsa hua
murshid hi ne ye mujh se kaha kuchh hua to hai
mujh ko paḌa mila hai vo majdhar men to phir
paani pe hai ye kis ne likha kuchh hua to hai
koi nahin tha jo ki sune us ki baat ko
aḳhir vo bolta hi raha kuchh hua to hai
avaz aa rahi hai koi chiḳhti hui
‘arpit’ nikal ke dekh zara kuchh hua to hai
Leave a Reply