chashm-e-nam pahle shafaq ban ke sanvarna chahe
aur phir ret ke daman pe bikharna chahe
ajab insan hai vo sehr ye karna chahe
aankh se dekho agar dil men utarna chahe
kuchh ajab us se taalluq hai ki us ki har baat
mauj-e-khun ban ke mire sar se guzarna chahe
saara din dhuup ke sahra men rahe sargardan
shaam hote hi samundar men utarna chahe
khud rahe taan-o-malamat ka hadaf us pe kabhi
apni rusvai ka ilzam na dharna chahe
aaina jaan ka mukaddar sahi lekin ‘shahin’
dil ki tasvir to ankhon men utarna chahe