Rasheed Qaisrani
naam hamara duniya vaale likhenge ji-daron men
naach rahe hain apni apni laash pe ham bazaron men
ek purani rasm hai baaqi aaj talak darbaron men
chand se chehre chun dete hain patthar ki divaron men
aaj kahan hain shahr men yaaro unchi gardan vaale log
aam hain ab to paanv baḌe aur sar chhoTe sardaron men
paar utarne valon ko ab divanon men ginte ho
shayad ḳhush-qismat the vo jo Duub ga.e manjdharon men
kya ma.alum koi chingari jaag uThe aur chiḳh paḌe
behtar hai tum haath na Daalo in bujhte angaron men
vaar pe vaar sahe hain lekin ek lahu ki buund nahin
jism hain saare patthar ke ya kaaT nahin talvaron men
kanch ke ye chamkile TukḌe aḳhir ḳhuun rulate hain
dil se sachchi chiiz na banTo un jhuTe dil-daron men
kaun tumhara dard baTa.e kis ko itni fursat hai
naam ‘rashid’ tum apna likh lo ḳhud apne gham-ḳhvaron men
Leave a Reply