Aankh Se Dil Mein Aane Wala

aañkh se dil meñ aane vaalā

dil se nahīñ ab jaane vaalā

ghar ko phūñk ke jaane vaalā

phir ke nahīñ hai aane vaalā

dost to hai nādān hai lekin

be-samjhe samjhāne vaalā

aañsū poñchh ke hañs detā hai

aag meñ aag lagāne vaalā

hai jo koī to dhyān usī kā

aane vaalā jaane vaalā

husn kī bastī meñ hai yaaro

koī taras bhī khāne vaalā

Daal rahā hai kaam meñ mushkil

mushkil meñ kaam aane vaalā

dī thī tasallī ye kis dil se

chup na huā chillāne vaalā

ḳhvāb ke parde meñ aatā hai

sotā pā ke jagāne vaalā

ik din parda ḳhud ulTegā

chhup-chhup ke tarsāne vaalā

‘ārzū’ in ke aage hai chup kyuuñ

tum sā bāteñ banāne vaalā

Leave a Comment