Saba Akbarabadi
us ka va.ada ta-qayamat kam se kam
aur yahan marne ki fursat kam se kam
sah sake dard-e-mohabbat kam se kam
dil men itni to ho taqat kam se kam
is ki yadon se kahan hai dushmani
sham.a jalti sham-e-furqat kam se kam
us ke milne se na hoti raushni
ghaT to jaati gham ki zulmat kam se kam
dekhne se un ke ye hasil hua
ho ga.i apni ziyarat kam se kam
us ke ḳhat men aur sab kuchh tha magar
sirf matlab ki ibarat kam se kam
dard dene ke vahan saman bahut
aur taḌapne ki ijazat kam se kam
kyuun gham-e-dauran ziyada mil gaya
thi hamen jis ki zarurat kam se kam
ḳhair tum se dosti mushkil sahi
rahne do sahib-salamat kam se kam
dekh kar un ko ye andaza hua
hogi aisi hi qayamat kam se kam
daulat-e-gham ki faravani sahi
daman-e-dil men hai vus.at kam se kam
gham nahin jo chand yaden saath thiin
kar to li dil ki hifazat kam se kam
sina-chaki umr bhar ki hai ‘saba’
zaḳhm silne ki thi muddat kam se kam
Leave a Reply