kaisa manzar guzarne vaala tha
aankh se Dar guzarne vaala tha
vo ajab rahguzar thi jis ka
mustahiq har guzarne vaala tha
vaqt se main guzar raha tha magar
vaqt mujh par guzarne vaala tha
ek hi dil mila tha aur dil bhi
kuchh na kuchh kar guzarne vaala tha
us ne bheje the ashk manzar men
ḳhushk se tar guzarne vaala tha
mere raste ko kar diya hamvar
mujh se behtar guzarne vaala tha
jaan hatheli pe rakh ke maqtal se
ek ḳhud-sar guzarne vaala tha
main ne zanjir rail men khinchi
jab mira ghar guzarne vaala tha
shukr hai kaam aa ga.i hikmat
ḳhair se shar guzarne vaala tha
main vahi kar nahin saka sad-haif
kaam jo kar guzarne vaala tha
mere dil ki hava se ‘zeb’ us din
mor ka par guzarne vaala tha
Leave a Reply