kohra oḌhe Tahal rahi thi jhiil pe gahri ḳhamoshi
phir suraj ne dhuup bicha.i tab kuchh Thahri ḳhamoshi
shab ki saaḌi pahan ke siine par bal khati hai mere
din ka anchal oḌh ke sharmati hai sunahri ḳhamoshi
gaanv ki us ḳhamoshi men ik lazzat thi albeli si
kamra kamra ghonT rahi hai har pal shahri ḳhamoshi
gum ho ga.iin hain meri sada.en kho ga.iin hain sab avazen
chiḳhen tak bhi sunti nahin hai haa.e ye bhari ḳhamoshi
yaden gavah hain jazbe qaidi hijr hai munsif vaqt vakil
roz lagati hai is dil men ishq kach.hari ḳhamoshi
man mandir men dhyan magan hai ik tera sachcha sadhu
aur sadhu ke phere leti jogan gahri ḳhamoshi
sub.h ke manzar jhulas ga.e hain shaam ki jhilen sadiyon duur
hijr ki dhun par raqs-kunan hai garm do-pahri ḳhamoshi
Leave a Reply