ajal ne luut liya aa ke karvan-e-hayat
suna raha huun zamane ko dastan-e-hayat
hazaron karvaten badlin zamane ne lekin
uthe na khvab taghaful se khuftagan-e-hayat
raha na piiri men jab kuchh bhi zindagi ka maza
sahar ke vaqt chale uth ke mehman-e-hayat
rah-e-adam ki vo dushvariyan maaz-allah
ki mar ke pahunche hain manzil pe rahravan-e-hayat
bahar-e-jalva-gah-e-yar tera kya kahna
adam se aae hain hasti men taliban-e-hayat
yahi bulandi-o-pasti hai bas zamane ki
hai ik zamin-e-hayat ek asman-e-hayat
kisi tarah bhi talafi-e-zist ho na saki
qaza ke sar pe raha khun-e-kushtagan-e-hayat
khila na ghuncha-e-dil bagh-e-dahr men ‘afqar’
khizan-nasib raha apna gulistan-e-hayat
Leave a Reply