na jaane kis ne kaha tha bhaTakte aahu se
mahak raha hai ye jangal tiri hi ḳhushbu se
jhulas raha tha ka.i din se aankh ka sahra
ye dasht ho gaya sairab ek aansu se
vo hijr tha ki andhera sa chha gaya dil men
vo yaad thi ki chamakne lage the jugnu se
mire liye to vo divan-e-‘mir’ jaisa tha
hua tha nam kabhi kaghaz jo pahle aansu se
to aankh bhar ke un ankhon men dekhna hoga
to hoga aise hi jaadu ka toḌ jaadu se
hava ka zor hai kya dhuup ki hai kya shiddat
ki ansuon ki dua.en bandhi hai baazu se
hava ke lams ne mahka diya mujhe ‘faruq’
hava ne haath rachaen hain kis ki ḳhushbu se
Leave a Reply