dua ka tuuta hua harf sard aah men hai
tiri judai ka manzar abhi nigah men hai
tire badalne ke ba-vasf tujh ko chaha hai
ye e’tiraf bhi shamil mire gunah men hai
azaab dega to phir mujh ko khvab bhi dega
main mutmain huun mira dil tiri panah men hai
bikhar chuka hai magar muskura ke milta hai
vo rakh rakhao abhi mere kaj-kulah men hai
jise bahar ke mehman khali chhod gae
vo ik makan abhi tak makin ki chaah men hai
yahi vo din the jab ik dusre ko paaya tha
hamari sal-girah thiik ab ke maah men hai
main bach bhi jaun to tanhai maar dalegi
mire qabile ka har fard qatl-gah men hai
Leave a Reply