agar allah ki vahdaniyat taslim karte ho
to phir insan ko ḳhanon men kyuun taqsim karte ho
mohabbat dastaras se lafz-o-ma.ani ki hai bala-tar
miyan tum us ki bhi tashrih aur tafhim karte ho
tumhara qaul kyunkar mo’atabar Thahre ki tum us men
kabhi tansiḳh karte ho kabhi tarmim karte ho
haqir un ko samajhte ho jo hain tauqir ke qabil
razilon ki magar tazim aur takrim karte ho
baghavat kyuun nahin karte ḳhuda-vandan-e-batil se
ḳhuda bar-haq hai is haq ko agar taslim karte ho
agar qaabu nahin ḳhud par to sab be-sud-o-la-hasil
bahadur laakh ho tasḳhir haf-iqlim karte ho
in avara parindon ko pakaḌ paate ho tum kyunkar
ḳhayalon ki ai ‘rahi’ kis tarah tanzim karte ho
Leave a Reply