Jism Ki Kashti Mein Aa

hava ke paanv is ziine talak aae the lagta hai

diye ki lau pe ye bosa usi ka hai

miri gardan se siine tak

kharashon ki lakiron ka ye gul-dasta

tilismi qufl khulne ki isi saaat ki khatir

hijr ke mausam guzare hain

hava ne muddaton men paanv paani men utare hain

miri pisli se paida ho

vahi gandum ki bu le kar

zamin aur asman ki vusaten

mujh men simat aaen

uluhi lazzat-e-nayab se sarshar kar mujh ko

main ik pyasa samundar huun

tu apni jism ki kashti men aa

aur paar kar mujh ko

Leave a Comment