Mujhe Utni Hi Qadr-E-Zindagani Hoti Jati Hai

Poet

mujhe utni hi qadr-e-zindagani hoti jaati hai

kisi ki jitni mujh par mehrbani hoti jaati hai

ḳhuda ma.alum ye kaisa zamana aata jaata hai

ki har har saans ab to imtihani hoti jaati hai

mohabbat karne vaala su-e-manzil baḌhta jaata hai

jo mushkil aati jaati hai vo paani hoti jaati hai

jidhar jaao musibat hai jidhar dekho musibat hai

musibat ab to juzv-e-zindagani hoti jaati hai

ḳhuda ka shukr dil rah-e-vafa men miTta jaata hai

jo faani chiiz hai vo javedani hoti jaati hai

ham apna daur-e-mazi bhulte jaate hain ai ‘sharib’

qayamat hai haqiqat bhi kahani hoti jaati hai