Farigh Bukhari
masih-e-vaqt sahi ham ko us se kya lena
kabhi mile bhi to kuchh dard-e-dil baḌha lena
hazar tark-e-vafa ka ḳhayal ho lekin
jo ru-ba-ru hon to baḌh kar gale laga lena
kisi ko choT lage apne dil ko ḳhuun karna
zamane bhar ke ghamon ko gale laga lena
ḳhumar TuuTe to kaise ki ham ne siikh liya
jo tu na ho to tiri yaad se nasha lena
safina Duub bhi jaa.e to gham nahin ‘farigh’
na bhuul kar kabhi ehsan-e-naḳhuda lena
Leave a Reply