kaise dukh kitni chaah se dekha
tujhe kis kis nigah se dekha
shiddat-e-la-zaval se chaha
hasrat-e-be-panah se dekha
itna socha tujhe ki duniya ko
ham ne teri nigah se dekha
shauq kya ghair-mo’tabar Thahra
tu ne jab ishtibah se dekha
apni tarik zindagi men tujhe
ḳhub-tar mahr o maah se dekha
ahl-e-dil par tiri kashish ka asar
apne hal-e-tabah se dekha
dushmanon se jo gham na dekha tha
koshish-e-ḳhair-ḳhvah se dekha
gham giran-tar hai koh se jaana
ham subuk-tar hain kaah se dekha
da.imi duriyon ka sadma ‘ziya’
sarsari rasm-o-rah se dekha
Leave a Reply