ai zauq arz-e-hunar harf-e-e’tidal men rakh
main ik javab huun mujhi ko mire saval men rakh
nuqush-e-ḳhak-e-badan ko tu muntashir kar de
mire vajud ko phir mere ḳhatt-o-ḳhal men rakh
phir us ke ba.ad hunar dekh mo.jiza.i ke
tu is badan ko mire dast-e-ittisal men rakh
tu mujh se mangna phir mere roz-o-shab ka hisab
ai haal haal mire mujh ko mere haal men rakh
burida-sar ko saja de fasil-e-neza par
darida jism ko phir arsa-e-qital men rakh
ye dard teri amanat hai so ise tu sambhal
ye mera dil hai ise qarya-e-malal men rakh
tujhe ghurur hai main bhi bala ka ziddi huun
ai meri jaan tu is baat ko ḳhayal men rakh
suna hai tujh ko bhi hai sher-o-sha.eri se shaghaf
tu mere sher ko phir ‘shahid’ misal men rakh
Leave a Reply