Tariq Naeem
poshida kisi zaat men pahle bhi kahin tha
main arz o samavat men pahle bhi kahin tha
ik lamha-e-ghaflat ne mujhe zer kiya hai
dushman to miri ghaat men pahle bhi kahin tha
be-vaj.h na badle the musavvir ne irade
main us ke ḳhayalat men pahle bhi kahin tha
is ke ye ḳhad-o-ḳhal zamanon men bane hain
ye shahr-e-mazafat men pahle bhi kahin tha
kis zo.am se aa.i hai sahar le ke ujala
suraj to siyah raat men pahle bhi kahin tha
ik harf jo ab ja ke samar-bar hua hai
vo meri munajat men pahle bhi kahin tha
main chaak pe rakkha na gaya tha ki mira zikr
na-gufta hikayat men pahle bhi kahin tha
Leave a Reply