Dekh Pagli Na Dal Laga Mere Sath

dekh paglī na dal lagā mire saath

itnī achchhī nahīñ vafā mire saath

yaar jo mujh pe jaan vārte the

kyā koī vāqa.ī marā mire saath

maiñ to kamzor thā maiñ kyā laḌtā

vo magar phir bhī laḌ paḌā mire saath

maiñ pareshān tau nahīñ mire dost

itnī hamdardī mat jatā mire saath

ai ḳhudā tū to jāntā hai mujhe

tū ne achchhā nahīñ kiyā mire saath

ab mire paas phūTī kauḌī nahīñ

ab nahīñ koī boltā mire saath

Leave a Comment