aaj jalti hui har sham.a bujha di jaa.e
gham ki tauqir zara aur baḌha di jaa.e
kya isi vaste sincha tha lahu se apne
jab sanvar jaa.e chaman aag laga di jaa.e
aql ka hukm ki sahil se laga do kashti
dil ka israr ki tufan se laḌa di jaa.e
duur tak dil men dikha.i nahin deta koi
aise virane men ab kis ko sada di jaa.e
tabsira ba.ad men bhi qatl pe ho sakta hai
pahle ye laash to raste se haTa di jaa.e
maslahat ab to isi men nazar aati hai ‘ali’
ki hansi aa.e to ashkon men baha di jaa.e
Leave a Reply