Nuzhat Abbasi
mohabbat men kami si rah ga.i hai
ki bas ik bebasi si rah ga.i hai
na jaane kyuun hamare darmiyan ab
faqat ik barhami si rah ga.i hai
ajab ye saneha guzra hai ham par
tire gham ki ḳhushi si rah ga.i hai
samundar kitne ankhon men utare
to phir kyuun tishnagi si rah ga.i hai
nahin chaḌhta hai ab yadon ka dariya
magar ik bekali si rah ga.i hai
ḳhalish dil men koi baaqi hai ab tak
ki ankhon men nami si rah ga.i hai
vahi ik baat jo kahni thi tum se
vahi to an-kahi si rah ga.i hai
Leave a Reply