Mushaf Iqbal Tausifi
ab kisi ko dekh kar ik samt muḌ jaate hain ham
jis se milna chahte hain us se katrate hain ham
log tujh ko bevafa kahte hain in se kya gila
rang-e-duniya dekh kar ḳhamosh ho jaate hain ham
ye nami ankhon ki siine ki jalan jaati nahin
teri mahfil men bhi tanha.i se ghabrate hain ham
muḌ ke dekha tha to saara shahar patthar ho gaya
lauT kar aa.e to har patthar se Takrate hain ham
kyuun zamane bhar ki ḳhushiyon se hai koi gham aziiz
aa.ine ke paas aao tum ko samjhate hain ham
Leave a Reply