Nami Nadri
phir use ḳhvab men dekha hai ḳhuda ḳhair kare
vo mire zehn pe chhaya hai ḳhuda ḳhair kare
us ne phir pyaar jataya hai ḳhuda ḳhair kare
koi to nek irada hai ḳhuda ḳhair kare
har ghaḌi ek dhamaka hai ḳhuda ḳhair kare
har nafas ḳhuun ka pyasa hai ḳhuda ḳhair kare
ye kisi ki bhi hui hai to bata.e koi
zindagi ek chhalava hai ḳhuda ḳhair kare
masnui chehra laga.e hue hai har koi
ab dikhava hi dikhava hai ḳhuda ḳhair kare
ghaliban zinda jalaya gaya hoga koi
chauk men kaisa dhuan sa hai ḳhuda ḳhair kare
phir koi gul vo khila.ega yaqinan yaaro
muskurata hua aaya hai ḳhuda ḳhair kare
ham ne jis shaḳhs pe ye ziist nichhavar kar di
ab vahi ankhen dikhata hai ḳhuda ḳhair kare
shikva sanji ka zamana nahin ye ai naama
vaqt nazuk hai buḌhapa hai ḳhuda ḳhair kare
Leave a Reply